top of page
38843985_10216577510092351_8642405022044

FOLLOW ME

  • Facebook Black Round
  • Twitter Black Round
  • Instagram Black Round

RECENT POSTS: 

SEARCH BY TAGS: 

尚無標記。

獨遊美國一個月

   其實唔夠一個月,大概25日嘅跳舞之旅,眨下眼就已經過咗去,喺我依然未適應到JETLAG嘅情況下,就已經要離開LA(我都估到會係咁㗎啦),不過翻到香港唔洗再適應翻時差問題算唔算係一件好事?哈哈,真樂觀。

   咁大個女第一次自己一個離開香港咁耐,亦都係第一次去亞洲以外嘅地區。以前去進修跳舞都係去日本韓國,始終某程度上文化同生活比較相似,我好想去啲國家係同香港嘅生活同文化完全唔一樣,出入大啲嘅(特別係跳舞方面),所以今次就的起心肝,乜都唔諗就係半年前買咗張機票去美國,決定再去學習同見識更多。

   我鐘意去旅行嘅原因,係因為會強烈感受到自己有幾渺小,世界太大,你會發現到自己嘅知識同所了解嘅一切或者視野真係好狹窄,而所有一直煩惱緊您嘅事完來根本無您想像中咁重要。透過旅行我會解開到好多心結,同時感受到好多新衝擊,亦都會更加清楚了解自己,更明確知道到底自己未來嘅人生想達成到咩野目標。不過坦白講,頭一個禮拜我喺美國的確係唔太適應,訓唔到又未習慣生活節奏,同期又發生咗啲事影響到我喺美國學跳舞嘅情緒,晚晚自己一個要控制到唔亂諗野實在太難(其實我係嚴重係Over thinking嘅人黎)。有口難言,事情嘅底與面,解唔開嘅誤會⋯⋯但所有都係成長嘅一課,個天比我經歷呢一課總有原因,係一個好好嘅經歷,代表依然有太多要學習同留意嘅地方。成長變成大人唔難,年齡只係一個數字,但要學識成熟處事,赤裸裸面對自己,接受自己,先係最困難嘅地方。

   喺美國學跳舞最大嘅得著,並唔係話學到一隻好勁嘅舞,或者上到一個好出名嘅老師堂,而係搵到翻個份「初衷」。正正係呢份「初衷」先會令我地感受到跳舞其實係有幾快樂。所有上堂嘅學生,什至係老師,您都可以感受到佢地將自己融入咗跳舞嘅快樂入面,一舉一動、散發出黎嗰種氣氛同自我滿足,坦白講自己都好耐無感受過,更加可以講話係羨慕,即使喺香港自己都會上堂會練舞,但完全係兩回事。有個老師講過段說話令我特別深刻,佢話「入到黎呢間房跳舞,我地唔係要為咗同人去比較或者贏人地而跳舞,亦都唔係為左可以企係最前,做到最受Focus嘅人而跳,更加唔應該去批評人地跳得好唔好。我地跳舞,只係為咗學習,為咗享受融入舞蹈嗰一刻嘅自己,為左快樂而跳舞,就只係咁簡單,Its all about love & having fun!」我當堂比佢點醒咗,被佢呢翻說話打動到我內心,跟住翻到屋企自己反省過後就發現到了,呢幾年點解會愈跳愈退步?愈跳愈迷失?有壓力?什至失去方向?原來係因為複雜嘅從來都唔係事情,係人心。

   我無特別限死自己淨係上邊種舞種嘅堂,總之有堂就上,即使係企左喺度或者落堂都未跟到音樂成功跳過一次都好,我都會上。成個低能咁好搞笑,個個都跳到上山下海嘅時候,得我一個身體跟唔切個腦咁企左喺人群中間。不過可以做學習嗰嗰真係好幸福,我每一堂都會學到唔同嘅野,有D老師注重思想同心態上嘅教導,有D就注重技巧或音樂質素上,各有不同,對我黎講係袋咗幾千萬落袋㗎啦!雖然每日2,3堂真係攰到一個點,不過咁攰都依然有動力會繼續想去上堂嘅話,我諗係因為呢種攰,太幸福!

   日復日咁,一個25日嘅跳舞之旅就係咁就完結咗,就好似發咗場夢咁!而家翻到黎香港有好多野想做,好多新嘅計劃目標等緊我!放咗自己成個月假,又係時候好好努力工作,繼續為過自己想過嘅人生而認真付出下苦功!為咗快D有下一次旅行,快D可以再去學跳舞,辛苦D比多D心機工作儲錢又有乜所謂,哈哈!去到呢度,您地要比D掌聲自己!因為真係好多謝您咁有心機睇哂我成篇千字文嘅分享!雖然文筆好差,但如果您依然鐘意睇嘅,留言話我知,我唔知醜打多D!哈哈!

我的小分享

之前有感而發同大家分享過我自己嘅心路歷程
然後近排身邊好多人話我知佢地因為我嘅片&訪問而鼓勵到佢地

令佢地勇於接受自己 做回自己
我真心覺得感動
所以希望同大家分享多一次前排我嘅感受
希望鼓勵到更多有需要嘅人!

「人生要過得坦言自在快樂,必須從自己內心世界開始改變。」 曾經有一段好長嘅時間我生活得好迷失,想得到快樂,但唔知點樣可以快樂,原來人大咗,想得到最簡單嘅野反而係最難。

一直以為自己係快樂,口口聲聲話自己過得開心滿足,但根本心底裏靈魂無得到自己真正嘅愛惜&欣賞同滿足,淨係識嫌棄自己,眼入面睇唔到自己擁有嘅野,只睇到自己得唔到嘅野,一直追求一啲唔屬於自己嘅野,亦只去做人地想要嘅自己而唔係自己喜歡嘅自己。老實講以前口口聲聲話唔介意人地點睇自己,但根本好在意,傻到扭曲自己去令人地鐘意,實在太傻。

直到有一日好老土,問自己生存為乜?自己嘅人生意義係乜?到底餘下嘅人生係咪就會咁過?先發現,一直以黎我都忽略咗自己內心嘅感受,亦都無真正同自己去好好接觸,溝通同聆聽自己內心。

所以我決定重新出發,做自己想做嘅丁可欣,愛惜自己,欣賞自己,過自己想過嘅人生,做自己想做嘅事,為自己嘅目標每日去努力奮鬥。

我要好多謝現在呢一刻嘅我,丁可欣我想話您知道,您好堅強,好叻!您一直都無放棄自己,雖然行錯過迷失過,但人生就係咁架啦,有高低起伏先正常,如果人生一直以來都只有美好,咁我地就無辦法好似而家咁堅強,right ?


所以,其實快樂好簡單,

將快樂複雜化嘅,係我哋自己。

bottom of page